حبيب قلبي الألمظاوي ... أهلا بيك...  سواء مساكن أو عزبة أو حتى بيوت المفتشين ابتسم انت ابن ألماظة يعني  منطقة الرجولة ومنبع الأدب ومنبت الجدعنة وشبابها اللي زي العسل بالصلاة ع النبي أحسن شباب ساعة المحن تلاقيهم يد واحدة وكمان الجيران عارفين بعض  وقلبهم على قلب بعض ومهما حصل ما بينا برضه مسيرنا لبعض وعلى رأي نجاة مهما الأيام تعمل فينا ما بنستغناش عن بعضينا ..  

 

منين جت تسمية ألماظة

===============

بيقولوا سموها كده عشان أيام زمان قبل مطار القاهرة الدولي كان المطار الرسمي مطار ألماظة ومن الجو بلليل بتبان زي حتة الألماظ في وسط الصحراوأقدم ناس في ألماظة بيقولوا ان الحتة اللي عند مدرسة ألماظة الابتدائية اللي قدام موقف السوبر جيت هي أقدم مكان فيها وبعدين العزبة الجديدة اللي عند الرابطة كانت زمان هي القديمة واتهدت واتبنت قبل ما يملكوها وبعدين العزبة القديمة دلوقتي وبرضه ملكوها وبنوا بيوت ومساكن مكان عشة عمك علي فولة الله يرحمه وبعدين المساكن القديمة اللي عند الفرن واتبنت في الستينات وبعدها المساكن الجديدة اللي عند آخر الأوتوبيس ولو ان شكلها أقدم وكانوا ساعات بيسموها مشروع ناصر وطبعا ما ننساش بيوت المفتشين ولو ان أهلها ما بيحبوش الاسم ده عشان بلدي (ياي) وبيفضلوا يقولوا احنا من ألماظة شارع عمر بن الخطاب ونسيو ان بيوت المفتشين أصلا اتعملت دور واحد قبل التمليك على شكل قبب تشبه الطرب قال ايه عشان ما يعملوش افران فوقها وما يقدروش يبنوا وسبحان مغير الأحوال الدنيا اتغيرت وبعد التمليك قفزوا قفزة تانية وعشان كدة لازم يعرفوا ان الزمالك معناها في اللغة التركية العشش وان بولاق معناها البحيرة الجميلة وان أهل الزمالك كانوا بيشتغلوا عند أهل بولاق بس ما دايم الا وجه الله

مكانها

====

... وألماظة للي مش عارفها يابن عمي  مكانها في آخر مصر الجديدة على أول طريق السويس نهاية شارع الثورة وليها مواصلات ياما  من العتبة أتوبيس 54 وميني باص 40 ومن بولاق الدكرور أتوبيس 54 بشرطة ومن جامعة القاهرة ميني باص  39 وكمان 39 بشرطة ولو انت في شبرا الخيمة تركب 927 عادي وبشرطة و956 لو في مدينة النور  عادي وبشرطة وكمان الترماي من المطرية أو رمسيس ده غير الميكروباص من أحمد حلمي أو المطرية واوعى تنسى ميني باص 15 الجديد من العتبة برضه والمكيف 796 من الجيزة بس اصحى يا صاحبي ده تذكرته اتنين جنيه ومافيش فيه مصلحة . ومعلش لو ناسيين مواصلة ابقوا فكرونا بيها

 

الخدمات

=====

ألماظة بقى يا وزير فيها كل اللي ممكن تحتاجه سواء أسواق أو خدمات أو مكاتب خدمة جمهور فمثلا تلاقي عندنا مكتب الصحة وكمان البريد غير العيادات الطبية  الحكومية والخاصة وشركة فايزر للأدوية ومصنع ايديال وشركة الغاز وفرن بلدي وفرن الي وفرن فينو وكمان سوق حلو في كل شيئ وجمعية

 

ألماظة كمان فيها شوية جناين تعجبك ومساحة الخضرة فيها تعتبر كبيرة عشان كدة المساكن القديمة بيقولوا عليها أحسن مساكن اتعملت في مصر  فيها جاع في المساكن وجامع في العزبة ده غير جوامع الجيش اللي برة ع المترو وحديثا عملوا سوق جديد ورا شركة الغاز وفي ظهر بيوت المفتشين نقلوا فيه بعض نشاطات الحرفيين زي الكاوتش وصيانة السيارات ونشكر رئيس الحي على مجهوداته وياريت الشباب الألمظاوي من وقت للتاني يروح يتمشى هناك أهو يعمل حركة برضه ومن ناحية تانية الناس متحسش انها لوحدها مقطوعة لا حس ولا خبر

 

ألماظة والكورة

=========

ولو انت من محبي كرة القدم ألماظة ليها باع طويل في الكورة ونادي ألماظة اللي ورا تيفولي هليوبوليس ياما خرج معلمين مشهورين ومنهم على سبيل المثل لا الحصر محمد علي حمادي الشهير بسوري  ومصطفى منصور وسمكة ومحمد امام وحكيم مرجان وغيرهم  وكل دول لعبوا أهلي وزمالك وترسانة وسويس ومصانع  وزمان كان المشير عبد الحليم أبو غزالة بيمرن الجيش في ألماظة قبل ما يبقى وزير دفاع ومعاه أنور سلامة وكان اسم ألماظة له شنة ورنة

وما ننساش الكورة الشراب والدورة الرمضانية اللي بدأها المرحوم محمد حسن ولسه محافظين عليها ويارب تفضل مستمرة وألماظة شافت لعيبة كبيرة قوي فيها منهم علي دهب وفرقته وشكوكو وفرقته وحسن داش وفرقته وخالد أبو ديانا وفرقته والشباب الموجود دلوقتي  فيهم مستوى عالي جدا وياريت تتابعونا في الدورة الرمضانية علما بأن آخر دورة  فاتت كان المشرف عليها خالد علام الشهير  فوندا

 

ألماظة والسياسة

==========

زمان ألماظة عشان كان معظم العمال بيحبوا عبد الناصر وكانوا حاسين انهم أخذوا مكاسب من ورا الثورة كانوا معظمهم مع الثورة وياما طلعوا العمال في مسيرات تأييد للريس ونظرا لأن المنطقة بالنسبة للمطار هي أقرب منطقة ذات كثافة فكان غالبية مسيرات التأييد تطلع من ألماظة قبل أي حي تاني  وظهر في ألماظة أسماء سياسية زي عاطف الرملي وعزت ماهر بس سبحان مغير الأحوال من حال الى حال ودلوقتي الحزب الوطني مسيطر على الحركة السياسية المحدودة بقيادة الأخ صلاح متولي والراجل على حد علمنا خدوم وجدع وما ننساش المستشار اللي خدم ألماظة كتير قوي

 

ألماظة والمشاكل القانونية

===============

يمكن أهم مشكلة دلوقتي تهم الناس هو تمليك المساكن والشرك (مصر الجديدة للاسكان والتعمير) وهي اللي بتملك المساكن رافعة قضايا على أكتر من 70 حالة وعاوزة تنفذ أحكام الطرد فيهم أو تعيد لهم تمليك الشقق اللي اشتروها من أصحابها المستأجرين الأصليين - وان شاء الله في أول تحديث للموقع ح نذكر المشكلة بالتفصيل واللي عاوز يستفهم أكتر ممكن يسأل الأخ / صابر نصر اللي بيشتغل في الشركة في وظيفة مرموقة وعارف الفيلم من أوله وهو ساكن في بلوك 15 شقة 2 المساكن القديمة.

 

ألماظة يد واحدة

=========

بصراحة بقى موضوع البانجو لابد ونتصدى له كلنا - يعني اللي بيشربه لازم يبقى راجل وقد المسئولية ويبطل وما يخافش من التريقة والتقطيع بتاع الصيع اياهم ولما يبطل يقول لي واحد يجيب له سيرته أنا طلعت راجل وحر وبطلت لكن انت لسه عبد وعيل صغير مش قادر تسيطر على نفسك والمثل بيقول اللي مزاجه يمشيه بكرة يبيع شرفه

واللي ما بيشربش يا ريت يبطل سلبية شوية وعاوزينه مبدأيا يخبط في اللي بيشرب كمرحلة أولى وبعدين يهدده بتبليغ أهله مرحلة تانية والمرحلة التالتة يهدد بتبليغ الحكومة والرابعة فعلا يبلغ ويبقى كدة عمل اللي عليه ونفذ كلامه ومخا فيهاش أي ندالة ولا يحزنون لانه هدد ونفذ تهديده يعني من الآخر راجل ابن راجل بالصلاة ع النبي بيقول وينفذ وينجز واللي مش عاجبه يبقى شاب راكباه الخيبة والعبط طريقه وسكته وأحسن له اللي يتعمل فيه

لأنه بصراحة كدة ومن الآخر مسألة البانجو دي هطل مش مزاج ولا كيف دي ولامؤاخذة عيلت والراجل الصح اللي أبوه جايبه من صلبه من غير شك هو اللي يقدر يقول خلاص وقفت والجدع يوريني نفسه

 

ألماظة والكمبيوتر

==========

ياخويا الحزب كان عمل دورتين تلاتة وبعدين لا حس ولاخبر ايه الحكاية يا عم الحزب ... عاوزين دورات ورا بعض تلم الشباب وبسعر ضعيف وياريت بعد الدراسة عشان الشباب يقدر يعيش مع التكنولوجيا صح وكمان ياريت تخلوا دورات للشباب وللبنات وتعملوا مسابقات واللي يطلع الأول ننزل اسمه في المواقع وممكن نرشحه للشغل كويس وكمان ممكن نعمل مسابقات مختلفة ونبدأ بالطباعة العربي والافرنجي واللي يكون أسرع ياخد شهادة ويترشح لوظيفة عن طريق الحزب عشان عاوزين ننمي روح المنافسة الصحيحة بين الشباب والبنات بعيد عن الخيابة ... مش كدة ولا ايه ؟؟؟؟

 

ده من ناحية ومن ناحية تانية ياريت بمنتهى الأدب كدة يتم الاتفاق مع أصحاب النت كافيه على تشغيل مواقع مفيدة للشباب بدل الألعاب عمال على بطال والشات اللي مبيجيبش همه ... طبعا لازم شات وألعاب وكل حاجة بمطلق الحرية بس برضه لازم نغذي عقول الشباب ونستفيد من الطاقة دي

 

لازم كمان نعلن عن مسابقات في السوفت وير والهارد وير واللي شايف في نفسه الكفاءة يتقدم واحتمال يطلع عباقرة ونوابغ وفي يوم من الأيام كل ألماظة تفتخر بيهم